MH MEMORIES

荷花 + 荒木經惟

2011-06-29T22:36:00.005+08:00

夏天到，又係影荷花的時候。上星期六去咗城門谷影，講真今次再影，影來影去同以前影的分別不大，感覺好難有突破，甚至覺得上年影得仲好（第一次想把post咗出嚟fb的相delete）。嘗試用多啲close up同角度去構圖，反而覺得唔知影緊咩。始終冇法影出荷花的韻味。或者有啲主題係唔可以亂影亂試。都係要睇下書同其他人的作品學習下先得。

今日終於睇完「荒木經惟的天才寫真術」，無可否認，佢的確係一個色色攝影家，而佢自己亦勇於向共衆表現自己的色。不過其實佢除咗人體藝術的作品，都拍咗唔少其他作品，只係大衆一般都關注佢人體作品而忽略了其他作品。所以有時真係唔可以睇表面或傳媒的報導就對一些人或事作判斷。如果一開始我只當荒木是專拍色情照的攝影師而沒有拿起這書的序看看，相信我已經錯過了這麼好的攝影書。雖然書中的確有不少色情的字眼及少許人體藝術的照片，不過其訪問內容其實談論到好多攝影理念，好值得深思或者學習。我唔話佢講的都好啱，不過的確有很多值得思考的地方。而其中一個好快的得著就係佢俾咗一個idea我去拍攝來參加公司攝影會最近的比賽，是時候拿起我的F80s同50 1.4了。 :)

我強烈推薦各位喜愛攝影的朋友嘗試睇下這本書（當然如果好介意色色的字眼或人體藝術照的話就別了。但平心而論，我覺得現在香港的o靚模寫真或報紙雜誌的娛樂版照片有時感覺比這書的內容更色。），詳細內容就由各位自己發掘，相信各位有不同攝影理念及經歷看這書時都會有不同的感受。

迎夏日

2011-06-25T21:59:00.002+08:00

過咗夏至，夏天嚟啦，又可以影到美麗的藍天白雲。今朝首先去城門谷影荷花，不過番到屋企電腦睇相先發現自己又招，CCD又入塵，張張相都有黑點，可能又要搵日再去過。

之後同TD同事睇X-Men，比高預期好，最近睇其套最好係這套。番屋企前又去酒停車場影相，我其實好鐘意啲旗，今日好天好風，當然有影佢地啦。

終於用得番blogger

2011-06-18T23:58:00.002+08:00

早幾日唔知咩事入極都入唔到Blogger，連朋友個blogger都入唔到。今日終於入得番，仲以為又要用yahoo添。唔知其他人係唔係咁。

梁靜茹演唱會

2011-05-17T20:21:00.004+08:00

最近好鐘意聽梁靜茹嘅歌，剛好佢下個月就嚟香港開演唱會，所以就搵朋友幫我買飛。其實大部份門票都售清，好彩個朋友識人可以買到內部飛，結果買到兩張$350，今日收到啦 :D。其實好耐冇去紅館睇concert，希望今次個show同佢以往嘅一樣精彩。

最近左耳成日發炎，今日下午又要去中環睇專科。睇完醫生番屋企前買咗C+偵探DVD，等我睇完先入場睇B+偵探。

火鳳燎原Online

2011-05-11T21:39:00.002+08:00

無意中係youtube睇到下面的宣傳片，仲要有主題曲，唔知集game係咪真係可以到火鳳燎原中的感覺呢？期待。 :)

http://www.gameone.com.tw/news_detail.php?type=5&id=1167

《火鳳燎原online主題曲：亂世》

天地撼動兵臨如山堵烽煙瞬起氣吞萬里如虎
戰幔漸開任駿馬馳騁幾度鐵血沙場舉劍肆意揮舞

旌旗蔽日擊戰鼓
縱然天命已定誓要扭轉乾坤定勝負

亂世生死殘存亦然無路
乾坤定群雄起贏取江山決勝今古

風雲際會決策勝似鷹揚智論兵法運籌千里逐鹿
血染河山殘存亦無路兵敗如山倒千裡亡命絕途

鳴號角乘風激昂如訴
唯見金戈鐵馬弓箭迸發交錯連天潛龍怒

亂世生死殘存亦無路
鳳舞動龍飛翔豪情灑滿黃土
志決成大業殺陣顛覆存亡
乾坤定群雄起贏取江山決勝今古

亂世生死殘存亦無路
鳳舞動龍飛翔豪情灑滿黃土
志決成大業殺陣顛覆存亡
天下亂戰連天由誰來定最終大局

天朗氣清下的景賢里

2011-05-08T23:11:00.004+08:00

之前仲好擔心琴日會落雨，難得攞到飛去參觀如果落雨就慘。好彩琴日最終天朗氣清，可以睇到係藍天白雲下的美麗建築，排成個鐘都值得。

其實室內佈置都好靚，難得啲傢俬保存得咁好。

琴日影完相今日就Shopping，終於買咗對新鞋。:)

愉景灣到梅窩

2011-05-01T22:56:00.008+08:00

好耐冇山啦，復活節本來去南丫島又落雨去唔成。今日參加另外一個行山活動終於冇落雨，雖然唔係天朗氣清，不過冇咁熱都好。第一次去愉景灣，估唔到咁靚同舒服，不過因為要出發，所以逗留唔到太耐，要搵次再去行下先得。

可能太少運動，其實條路唔太難行不過都行得好辛苦。而因為一路影相，所以已經行得算慢，總共行咗4個鐘。之後去咗長沙一間南非餐廳食lunch（4:30嘅lunch），野食都ok不過就真係唔就腳。雖然好攰，不過運動出下汗都好。

愉景灣碼頭外

好耐冇見過蝌蚪

好特別的聖母堂

行行下都見到藍天白雲

南非羊架 :)

新Display卡

2011-04-29T22:06:00.002+08:00

琴日收到美國打嚟嘅電話，好開心，好耐冇聽海豚叫聲啦，哈哈！可惜係Office唔方便傾太多，希望遲啲有機會再傾。:)

今日終於換番張Display卡，因為好多想試嘅野都行唔到，開Raw檔又好慢，但係又唔係太想換電腦，所以聽TinTin講試下換Display卡。因為部電腦係Low Profile，所以太勁嘅卡都唔洗諗。結果買咗張中低價的Sapphire HD5570。價錢$530，已經比之前好好多。如果公司有咁嘅Display卡畫CAD應該已經會快好多。

不過唔出去睇唔知，原來好多Display 卡已經有HDMI輸出（包括低價的），唔知遲啲係咪會冇晒VGA輸入的Monitor。

南丫島變景賢里

2011-04-23T20:56:00.005+08:00

今日本來同TD同事約好去南丫島，點知朝早又落雨，結果又要cancel。不過因為去唔成南丫島，反而變咗有時間去尖沙咀香港文物探知館排隊攞飛去參觀景賢里。之前上網登記攞唔到已經諗住冇得去，估唔到佢地加開仲要今日個活動cancel埋，冇理由唔去啦。

不過今日體驗到排隊買鹽嘅苦況。今日未夠10點已經去到（探知館開10點），點知已經見到長長嘅人龍，仲要攞籌，已經派咗過1000嘅籌，最大問題係張籌寫住佢嘅用途只係方便派飛的運作，唔代表一定可以分派到飛 -o- 不過香港人排隊能力真係好厲害，我排隊之後一直好多人加入，當時仲落緊雨。既然已經由屯門出嚟，冇理唔等，証明自己都係香港人，哈。結果排咗一個鐘，好彩攞到四張飛。

今日有帶相機，所以就係九龍公園影相，因為排隊途中見到雨中一啲唔錯嘅景。之後就去咗旺角同深水埗行同睇新Magic卡。結果最後都忍唔住買咗合Fat Pack，等我加少少入現有deck到玩下。:)

搬房

2011-04-08T22:04:00.006+08:00

最近阿媽因為親戚介紹，搵咗個風水師來睇風水，基本上冇咩要改動，大多建議我地唔同地方放一啲特別嘅飾物，例如白色石仔、大象、國旗、印章等。不過有個比較大嘅改動就係要我轉房同床與電腦枱有指定方向。結果要我搬房同買新床。

本來新床聽日送來，所以今日請假收拾清潔。點知新床上星期日提早送到，今日變咗得閒就出去行下順便去IKEA。以前一直都好想買佢地嘅菲林相架，但因為之前房冇位。而家間房被逼多留空間，就即刻想起個相架，今日就走去買。下面係新房嘅相 :D

梁靜茹

2011-03-28T21:18:00.003+08:00

成日係隔離同事電話的鈴聲聽到一首幾聽嘅歌，不過自己唔知首個嘅名同歌手名，所以一直都搵唔到嚟聽。但最近睇youtube過陣無端端又俾我撞到首個嘅mv，原來首歌係梁靜茹嘅「會呼吸的痛」，我自己本身好少聽台灣歌手，原來佢嘅歌都幾好聽，搵搵下仲發現自己以前聽過佢另外一首作品「勇氣」，自己都唔記得，要播先記起。

雖然舊啲，都post出嚟等大家回味下。順便當自己點歌希望日本盡快解決各災難，可能自己冇經歷二次大戰，其實自己都好鐘意日本同佢地嘅文化（遊戲機、日劇、日文歌、漫畫...），相信好多同自己差唔多年紀的人都享受過日本文化所帶來愉快的童年，祝願日本早日康復，我仲好想遊東京同影櫻花。

日本8.9級地震

2011-03-11T21:53:00.002+08:00

今日請假去咗花展，所以冇機會睇到新聞。當影完收到個阿妹電話話東京地震，即刻叫佢唔好留係屋到。之後都以為小事，因為日本經常有地震，點知睇到新聞原來有8.9級，仲有海嘯。好彩阿妹同其他係日本的朋友都平安，希望餘震唔好咁犀利，大家安安全全。

Container

2011-02-19T20:59:00.004+08:00

雖然成日玩boardgame，不過其實自己好少買，多數買的都是card game。不過前排居然上網發現一隻關於貨櫃航運的boardgame，真係好吸引，話晒自己係這行做咗咁耐。:D等我快啲睇完份說明書然後約人一齊玩先得。

新年快樂

2011-02-03T23:30:00.000+08:00

新一年又到，祝大家身體健康，開開心心。

癲雞

2011-01-28T23:29:00.002+08:00

最近多咗睇youtube睇MTV同一啲改編歌，今日睇到一隻改編C AllStar的天梯，我覺得啲詞改得好好，好反映到現在香港每況愈下的文化，睇見真係笑唔出。同啲音樂一樣悲傷。

朋友

2011-01-19T20:42:00.003+08:00

人與人之間的相處真係好奇妙，就算相識十載但係係某啲方面大家係完全唔了解。不過其實一啲都唔奇，因為就算身邊的親人同情女都會有自己嘅秘密或者需要同別的人分享嘅事情。如果因為突然觸及以往好少傾的問題而大家意見不合就影響到以往建立的友情實在好可惜。其實大家係那個層面完全冇互相關心同了解過，相方又點能怪責對方呢。

大掃除

2011-01-15T20:57:00.003+08:00

好似已經兩年冇參加CCG幫老人家年尾大掃除的event，今年同Janice阿Ben一齊參加番。大家約埋一齊食lunch之後就去社區中心。今次同組係兩位龍的司機同事，而去的地方係褔來村一對夫婦的家。對夫婦好好傾亦好客氣，雖然家中比較多嘢同好多地方需要清潔，不過一切都好順利。

下個星期就輪到自己間屋大掃除啦。 :D

又到聖誕~~

2010-12-27T20:16:00.010+08:00

一年好快又過，聖誕節話咁快又完了。三日假期除咗第一日開咗個Housewarming + X'mas Party之外，其他日子都係自己四圍行下。

第一日party影嘅合照，好多謝大家送嘅禮物。個高速煲仲未好識用 haha。同日仲上咗Hugo屋企試Kinect，XBox這體感儀器真係造得好好。

Boxing Day就去咗HK Photo Festival 2010其中一個重點影展 - 香港最早期的照片展。入面可以睇到好多好珍貴的照片，仲有最初用玻璃做嘅底片，無論喜唔喜歡影相都好值得去睇下。認識多些歷史之餘，又可以入去荷里活道警局影下相。不過展覽室內不準攝影，希望大家唔好好似我在場見到嘅影友不停偷影展覽品。如果真係喜歡攝影就更加應該尊重下主辦單位定下的規矩。

「對視」

睇完影展後就順便去埋遊戲展，不過對我嚟講場內真係冇任何吸引嘅嘢，仲要$28入場費，唔怪得咁少人。相比同場的冬日購物展真係差得多。

至於今日就先去醫院探VG，去到知道佢可以提早今日下午出院，籍得高興。之後就去睇Gundam Expo，不過今年冇模型比賽作品，有啲可惜。

英偉的劉備高達

'白'式

Hong Kong Photo Festival

2010-12-18T23:04:00.002+08:00

今日收工後就去咗九龍塘同Teddy 食飯，之前因為佢忙於宣傳東風破同打擂台，所以都好耐冇見。

食完飯就去咗JACCA睇Hong Kong Photo Festival，入面好多好靚嘅相，尤其是天文的相mm實有興趣。而上環舊警局有其中一個攝影展，下個星期清假時要去睇下。

條link有多啲關於 Photo Festival的資料大家睇下。

http://www.hkphotofest.org/eng/news.html

新居 + 抗癌大步走

2010-11-28T20:10:00.011+08:00

搬咗兩個星期，終於有心機寫blog。其本上一切都算順利，唯一係發現而家啲傢俬鋪送貨安排好混亂。今次分別係唔同鋪買，其中一間到咗送貨日

我打去追先發現張單冇人跟，仲到第二個星期約多次都重複多次話送唔到。但係另外一間居然可以係冇打俾我約實的情況下突然送貨來，個師傅仲要話我覆實ok。 =,= 不過最不滿嘅都係PCCW的服務，不過其實我一向都好唔鐘意佢地嘅服務，今次終於轉咗香港寬頻。

雖然都幾怒氣，不過總算攪好晒。下面幾張係入伙後影嘅新屋相（大廳）。

今日仲好健康去咗行山，就係參加2010的抗癌大步走。個活動基本同上年一樣，一樣的rundown，一樣的路線。不過做善事同做運動都冇所謂。不過住屯門之後搭車預時間就唔慣。今日約人遲到之餘仲差啲搭唔到活動安排的尾班車。haha

出發前的合照

天色好好

行呀行

大會的午餐 :)

成熟而又交投旺盛的香港地產

2010-09-27T21:06:00.002+08:00

最近買樓真係了解多咗好多香港嘅成熟樓市。月尾就會收樓，今日律師樓簽埋最後的買賣合約，結果又了解多兩個有趣地方。

因為琴日去埋驗樓，發覺有少少問題，但其實已經同地產及業主傾咗唔會再追究。但係就引發我諗到一個關於收樓過程的問題。其實收樓過程一定如下：

1. 買方驗樓

2. 買方到律師簽約交首期

3. 賣方到交易日簽約收錢

4. 賣方交匙給買方

因為過數及按揭，一般驗樓到收樓相隔好幾日。而驗樓就係要買方確定樓宇冇問題，簽約後就不能反悔。但由驗樓到收樓相隔的好幾日中間樓出問題，如果賣方破壞一幅牆，咁有冇得追究呢？嘅然要見律師又俾咗律師費，當然問下。

結果律師話我知驗樓到收樓的時間係灰色地帶，這段時間收事基本上好難追究，咁即係話驗樓係多餘。基本上驗完樓ok但到收可以面目全非。咁驗嚟做咩？律師跟住同我講最理想當然係驗樓後同一日簽約過數收樓啦，但佢亦話做到咁，唔同我請20人跟你個case咩。不過佢都好盡責咁同我講可以幫我攪小額錢債去追討，但唔知而家旺盛樓市下閒閒地都過2百萬嘅樓唔知算唔算小額。而這些就係我地啲小業主係咁成熟嘅樓市下得到嘅方律保障。xD

另外一個學到嘅就係關於「交契買賣」，雖然我係買樓嘅過程都聽過幾次「交契」，但真正的定義都唔係好清楚。由銀行申請按揭，地產的合約，至到律師樓落大訂，都有人提及，但冇人講解。直到今日律師要我簽向銀行的聲名先知「交契買賣」有一樣好重要的就係買家一定要自己或家人住，唔可以出租來收益。如果出租冇向銀行申報，銀行可以要業主即時清還所有借款，如果還唔到銀行就可釘契。其實銀行、地產同律師都知這事，但從來冇人向我地解釋，如果各位好似我咁因為業主新樓未攪好，自己懶好人簽張暫時租約俾人就隨時中招（仲要今次係地產向我地提議租約，但都冇同我地講咁嘅問題）。

其實以往睇好多新聞都有咁嘅感覺，但今次又証明法律都係保障律師的飯碗、商業機構同富豪，小市民（尤其懶好人個啲）絕對唔包。hahaha

追月夜

2010-09-23T23:30:00.005+08:00

追月終於出咗去影下花燈，今次又係去維園。花燈都幾靚，不過可惜就係多人，set腳架影就麻煩啲，不過最唔好就係啲人冇秩序同禮貌，久唔久就聽到人吵，影響晒影相嘅mood。

晒咗幾年花燈，其實覺得照影原來嘅設定已經有啲悶，

所以多試下用多重曝光創作。下面幾張就係多重曝光的作品。

鳳凰展翅

龍吐碧玉（緊據玉免的名，這真的不是珠而是玉）

自製仙鶴圖 :p

再次祝大家中秋快樂。

開心生日

2010-08-31T22:51:00.008+08:00

剛剛過咗32歲生日，又大一歲之餘仲變埋債仔。上星期六、日分別同唔同朋友一齊慶祝好開心。

星期六晚同豬Sam地一齊係澳海城食日式放題，都幾好食，價錢都ok。可惜我唔飲酒，日本啤酒仲任飲嫁。出去食飯前已來定腳架相機，希望可以影到想影嘅一張相，食完行到澳海城出面睇到月亮都算清晰，即刻set腳架影咗「1Q84的夜空」。如果有睇1Q84的朋友就知點解，一路睇小說都覺得入面描寫的「1Q84的夜空」好有趣，剛好我之前一直相試的EPL-1加Nikon鏡影大月亮，結果就下張小說入面的情景影出嚟。 :)

之後星期日一早就睇咗「線人」，唔錯呀，而且張家輝都的演出好好，我冇睇過証人，其他人話証人拍得仲好，遲啲搵機會睇番先得。跟住就去咗mm屋企玩boardgame同慶祝四個BD Stars生日。今年自己正日可以一齊慶祝好開心。

仲有多謝海豚嘅魔鬼蛋糕，我可以一日切兩次蛋糕同許兩個願望。 :D

除咗慶祝，當然唔少得自己俾自己的生日禮物，火鳳小說加我最鐘意嘅Flamenco 結他手Jesse Cook嘅最新Live DVD。

又走一個

2010-08-14T23:48:00.007+08:00

今日係Edward最後一日係HIT，計計埋埋今年TD已經走咗7個人（全team總共只得13人），市道好這公司真係留到人，唔知最後會走剩幾多個呢？ :p

琴晚同Edward Farewell，去咗黃珍珍食，已經好多年冇去過，而家嘅價錢好貴，而食物亦唔係特別好，唯一幾得好係可以坐好耐都唔會有壓力同服務態度都唔錯。不過下次食泰國嘢都係試下附近其他嘅鋪。

今晚同cc, mm食完飯帶咗部PEN去尖沙咀海傍影相，帶咗支Nikon300mm同2倍增距做成1200mm的效果，試完效果唔錯，可惜今晚影唔到我相用1200mm嘅嘢，希望下次影到。

1200mm下影的IFC頂

PEN Art Filter啲色好跨張... xD

東野圭吾與 1Q84

2010-07-15T21:49:00.004+08:00

前排因為無意中行書局睇中咗東野圭吾的「放學後」，買咗番屋企睇，好快就俾佢吸引，故事好多意想不到的發展。可能之前好少睇偵探小說，所以新鮮感比較大。

之後就再買多咗兩本佢嘅作品，分別係「偵探伽利略」同「信」。之前冇睇過偵探伽利略的日劇唔知拍得好唔好睇，不過這種科學化的推理我唔太鐘意，或者因為佢所引用嘅科學理論一般人沒有認識，所好難代入故事去一齊推理。

至於「信」唔係推理小說，但當中所描寫的兄弟感情因為哥哥坐牢及弟弟因此事所受的生活壓力而逐漸產生的變化寫得好好，好無奈亦同時好悲哀。三本作品暫時最鐘意都係放學後。

而近排行書局過陣又俾另一位日本作家的作品吸引咗。今次係村上春樹的「1Q84」，其實我只係睇到書背引用的其中一段內容而吸引咗。

‘不管喜歡與否，我們已置身於1Q84年。空氣變了，風景變了，規則也變了。我們必須盡快適應這個問號的世界。像被放進陌生森林中的動物，為了生存，我們必須盡快了解並順應1Q84的規則。’

好想睇作者講嘅1Q84的世界係點，而且見到好多書局都重點推介這書，所以覺得可以一試就買嚟睇。作者描寫的方法其特別，男女角兩人各自的故事鄰流一章的發展，最初睇覺得唔慣，因為兩人的背景及生活好似完全無關，但一路睇落去，開始發現兩條平衡線好像有些交錯，不過暫時仲未明白整個故事（感覺好複雜），要繼續睇落去先得。

不過其中有句描寫人的眼睛幾有趣，令我想到一個拍攝題材。‘眼睛忽而眯起來，忽而睜大，像攝影家在調整鏡頭的光圈一樣。’

等我睇完再繼續分享。 :)

印象 - 油塘/鯉魚門

2010-07-11T21:21:00.010+08:00

這幾年一直都有構思造自己網頁，特別想造一個印象系列的攝影，以相片記錄我係香港唔同地方所得的"MEMORIES"。之前比較懶，所以始終相唔多，而且對於掌握「印象」的感覺及能力亦未夠。不過最近有番動力去投入攝影，所以就開始試下係Facebook同這裡做印象系列，等有多啲相再造自己網頁。

至於這系列第一個地方就係油塘/鯉魚門。琴日第一次跟一位fb的朋友（本身唔識而係fb都未傾過計，但唔知點解又係fb friend :D）同佢其他的影友一齊去影相，感覺都幾好。同行仲有兩位經驗豐富的師兄，分享咗唔少影的知識。下次佢地再攪活動應該都會再去。

下面就同大家分享下相。

「一支得掛」- 油塘MTR外的裝飾，唔知邊個多手，不過加咗香煙後感覺更真實。

一直都覺得鷹的飛翔形態好靚，估唔到鯉魚門上空有好多，所以試拍下佢嘅美態。

「只供裝飾」 - 其實作為裝飾的未必只限於水泡。

「午睡天地」 - 大熱天時影相，我都想入去休息下。

「同一天空下」 - 雖然身處同一天空下，但有些人只能闇然活著。

「支撐」- 雖然夕陽將盡，但亦努力支撐著。

「鯉魚門燈塔」- 這張相正常的我自己一個應該影唔到，因為拍時要係燈光陰暗的情況下爬上直梯。以往只有我多數都會小心安全而放棄，但琴日一見到直梯沒被封，只係諗咗好短時間就爬咗上去，可能突然相機俾咗力量我。 :)

重曝洪湖荷花

2010-07-08T22:18:00.008+08:00

星期日又去咗深圳洪湖公園影荷花，今年遲咗去，所以人唔多。因為睇過師姊用多重曝光影的荷花作品，覺得幾靚同有趣，所以今次都試多咗。不過影出嚟嘅就......有待改進 :p

亦試過黑白

比較喜歡的一張，可惜對唔齊徑部同徑的倒影

玩野作品1，不過完全唔得

玩野作品2，感覺都係好怪 xD

其實仲有一樣成日偷懶唔做，就係早起身影日出光線下的荷花，不過下次再影可能已經係殘荷

10蚊店之好

2010-06-28T21:40:00.003+08:00

我己都幾鐘意Jusco嘅10蚊店，因為好多時都可以用10蚊去買一些其他鋪貴好多嘅嘢，而且好多時這些東西我覺得唔值咁貴。

早前我一直用開嘅腳架帶因為膠老化，用的時候經常滑落，所以已經準備買過條。今日放工去睇睇，自己用開的已經加價到$200，其他唔知咩牌子都二百幾，唔捨得買。其實之前想過條帶加個shoulder pad（如下圖），就可以繼續用。今日係啲相機鋪見到有，以為可以買個平平地去用，估唔到啲價錢比我腳架帶的價錢更嚇人，全部都過二百，雖然佢地的材料好，不過真係值咁嘅價？結果當然係放棄。

番屋企時去到10蚊店附近，心想會唔會10蚊店有shoulder pad，於是去睇睇，竟然真係有，當然唔洗諗即買，10蚊店又幫我慳唔少，條腳架帶又復活啦 :D

堅持的美

2010-06-16T15:51:00.008+08:00

好耐都冇攞齊相機出去影相，就算plan咗去影，好多時都因為唔同的原因（如天氣）而放棄，感覺自己好似越來越懶。

琴晚又plan今日去城門谷影荷花，雖然天預報話今日會落雨，但心想可能起身會好天，所以照較好鬧鐘。到咗今朝6:30鬧鐘響，睇睇窗外天陰陰而且仲好訓，結果又訓過。直到8:30真係訓醒，再向外望，依然一樣天陰陰，但唔知點解突然覺得自己應該堅持下，唔可以成日放棄自己最鐘意嘅活動，所以快快起身今嘢之後就出發，希望去到城門谷都未落雨。

上咗小巴一路去到葵芳終於開始落雨，但已經搭緊車，唯有寄望快啲落完。當到了荃灣落車時，點知雨越落越大，但都已經去到，就好阿Q咁諗影唔到都去探下路，下次再去就唔洗搵，而且又有帶雨傘，可能可以影下雨景。結果開住傘搵路去城門谷，行咗20分鐘左右終於到城門谷公園，續入去探下，估唔到一到咗荷花池啲雨就停，好好體驗天公造美 :D。不過更估唔到就係個池已經圍滿人，不得不佩服啲師兄師姐對攝影的堅持。

當然我亦立即整理相機，影呀影。雨後其實影荷花都唔錯，因為有好多水珠留係花上，而且我咁遲到啲花都唔乾。有時堅持努力一下係會有好結果嘅。

剛停雨已經圍滿人的池

雖然荷花係主角，但俾我發現一個有趣的品種，我叫佢「花蝶」。

充滿水珠的荷花

「生死之交」

「誘惑」 - 今日影到我最鐘意的一張

一支得啩 :D

2010-06-09T22:37:00.002+08:00

之前耐唔耐就會收到朋友email forward來小克漫畫，我自己都好鐘意睇，尤其係改歌詞那些。今日上網無意中發現小克又有新改編歌，今是陳奕信的一絲不掛，仲要搵番陳奕信佢唱，正。希望佢地嘅宣傳可以讓多啲人戒煙啦。

安息

2010-06-03T21:19:00.000+08:00

婆婆離開已經兩個星期，今日完成了出殯的儀式，希望婆婆安息。亦藉此向各位最後來探望婆婆的親友致謝。

送走用了十年多的物品

2010-05-08T23:44:00.003+08:00

今日一次送走了用了十年多的物品，第一樣是HSBC張信用卡。張卡由讀U時到現在，已經十多年，而自從儲Asiamile用CityBank同Compass之後，已經好少用這張卡。本來都唔想取消佢，點知最近懶環保，用了電子月結單，結果佢收我年費我冇check到(因為我近來都冇用這卡)，過咗4個月，佢地終於寄信嚟，條數變咗$1400，一睇見真係彈起。雖然我唔記得上網check月結單我有不對，但用咗張卡咁耐佢地都係要我年年打個電話先免我年費其實已經好不滿，所以為咗避免同樣事情再發生，今日一早去分行取消張卡。

去到搵職員取消張卡，佢見到我記錄用咗咁耐，同我講兩句勸我唔好取消，話免我未來一年的年費（都只是一年 =.=如果佢話永久免年費其實我會keep番），當然我還是同佢講取消，佢就開張form幫我取消。正想走之際，佢又叫住我sell我啲戶口升級，我話冇興趣，之後又問我要唔要睇下按揭服務（無端端做咩按揭!?），跟住仲要sell保險.........其實佢有冇留意客人是有不滿先取消服務？當然我明白佢都係搵兩餐所都好聲好氣拒絕佢。不過睇見現在我地香港咁有競爭力的金融服務業漸漸變成咁，或許只因為我其實未有資格成為佢地真正的客人。

下午就去咗捐已陪我十多年的玩具，就係部PS2啦。其實本來想賣佢出去，不過而家真係好難搵人收，就算有，都可能只有$200-300。倒不如捐俾有需要的人，於是上網搵這類志願組織，俾我搵到一個叫「繼續再玩」的團體，佢地專門收集舊玩具送俾啲有需要嘅小朋友。試下打去問下，咁啱因為有event所以星期六都有人係office，佢地工作時間其只係一至五。既然咁好彩，下午就帶咗部PS2去損啦。如果你都有舊玩具想捐，可以睇下佢地個blog。

http://hk.myblog.yahoo.com/toysreplay

捐部PS2之前同佢地影番張合照 :)

新舊交替

2010-04-19T21:04:00.009+08:00

唔經唔覺我部Kodak雙鏡DC已經陪咗我4年多，最近（其實2月已經開始係咁）可能因為老化而壞咗，已經開唔番部機。佢係第一部雙鏡頭相機，而且有唔錯的接相功（以前來講已經唔錯），仲有一點就係佢好似天空之城入面的機械人，領我回憶起童年的樂趣，所以當時決定買咗佢。雖然我覺得相機壽命一般都比較長，自己亦把所有相機盡力保養，可惜始終會有壞掉的一日。就好似身邊其他人或事一樣，新舊交替總是不停地發生。

因為好難成日都帶住部D200，所以都要買番部細機，比較過DC，好似S90,TX-5，PEN同GF1後，最後都係決定買Olympus嘅EPL-1。其實之前Olympus出EP-1嘅時候已經好有興趣，因為我一直想買部rangefinder的dc（RD1s）方便平時帶出街影snapshot，不過始終太貴。EPL-1價錢方面屬於可接受的水平，所以決定揀佢，不過未來兩三個月要洗少啲啦。

部Kodak會留番嚟收藏，希望可以長放外殼都唔老化啦。下面同新舊成員影番幾張相。

全球第一部雙鏡數碼相機

天空之城機械人現身

跟住到新成員 :)

隨心拍

2010-04-17T22:57:00.006+08:00

早兩日睇完一本叫「拍照前先學會想」的書，入面講咗好多以藝術層面去講拍攝的技巧同思路，是現在坊間比較少有的一類。雖然本書有些地方翻譯得不太好，但對於如果想開始走向藝術方向的影友來講是值得一看。可惜我這方面太弱，唔好話影，就算叫我去睇一張藝術相我都唔多識欣賞，所以睇這書時有好多地方都唔理解。或者應該去上下一些藝術分析的班去學習下，遲啲再睇過這本書。 :)

睇完本書即刻想影下相，就影下屋企，當然唔係藝術相，只係相享受下拍攝的樂趣。

突然回相起以前買過一張麥嘜卡的畫面，就影咗這張送俾海豚。哈哈！

已經唔記得今年邊個俾這對利是我，覺得好靚，所以貼起咗。

如果訓地下會見到的畫面

仲有mm同Sharon送嘅聖誕禮物

求婚大作戰的反思

2010-04-07T23:11:00.014+08:00

上次提過求婚大作戰套劇，其實仲有野想分享。我已經好耐冇追過日劇，對上一套追嘅日劇已經是電車男了，估唔到自己竟然於復活節期間日一日裡睇晒成套劇。

這套劇本身個Idea已經好有趣，故事講述主角正出席自己喜愛而又青梅竹馬的女主與別人的婚禮，經由妖精的幫助回到過去，希望自己於過去的時間作出改變，讓自己成功向女主角表白以改變未來。至於主角回到過去的時空就是與女主角的過去的SlideShow有關。

相信大家出席朋友的婚禮一定有睇過一對新人的童年SlideShow，其實以往我都不太明白為何每個婚禮都要有SlideShow。雖然有些相看完都會覺得有趣，但感受深的並不多。睇完這劇之後我終於感到這些SlideShow的重要性，之前未有太多感覺只係我沒有那些一起渡過的回憶。其實我成日話自己鐘意影相都係因為相片記錄了自己的回憶，點解之前會唔明。雖然現實好難發生，但如果能好似主角咁，有個每張相都充滿重要回憶（不論好與壞）的SlideShow，生活一定會好滿足。

除了故事同主線的Idea之外，套劇所轉達的訊息與日常生活上的感受其實都好吸引我。其中描述幾位經常一起的朋友，畢業後擔憂因為工作、婚姻而使關系變得疏離，相信很多人（包括自己）都有同感。近年朋友們漸漸成家立，這感覺對我來講也越來越強烈。

另外劇中講述主角多次穿越時空努力改變過去所發生的事，但始終未能改變到女主角與他人結婚的結果，而重中所得到的領悟亦好藉得深思。有時成日覺得周圍的事物影響了自己的生活，而希望改變這些事同物，但很多時候其實最需要改變的是自己。就好似劇中主角咁，就算得到回到過去的力量，但不改變自己，提起勇氣去行動，最後都只能後悔。

睇完套劇使我回想近年的生活，發生不少不愉快的事，使一向比較正面的我亦都多了不少埋怨。但想深一層，其實有些事自己都冇好好去面對，或者是時候作出一些改變。所以近日寫了一封信給一位因誤會而關系漸漸疏離的朋友，雖然未必能改變什麼，但起碼不想自己將來後悔呢。

Happy Easter!!

2010-04-04T16:25:00.007+08:00

又好耐唔寫Blog啦，首先祝大家有個開心復活節假期。仲有今日係表妹生日，祝你生日快樂呀！

上兩個星期又幫朋友影結婚相，發覺自己越來越鐘意影snapshot 捕捉下人們不同的表情同感覺。所以每次有類似event都鐘意用自己支105鏡頭去影下。下面有幾張自己比較鐘意的同大家分享下。

我日仲睇完套日劇求婚大作戰，套劇係2007年的作品，如果唔係無線播，都唔會睇呢。雖然套劇已經過時，不過我覺得好好睇呢，有時間不妨搵番來睇下。 :)

充滿壓力的新一年

2010-02-28T22:44:00.002+08:00

又有一段時間冇update這blog，其實由年廿八開始屋企不斷發生啲唔開心嘅事，以往積累的問題（或者應該話逃避嘅問題）始終都係會爆發，所以突然感到生活充滿壓力，亦都冇咩心機寫嘢，唔好話寫blog，其實出街都唔多想。

不過生活就算再多問題，最終自己都要去面對，或者現在就係去解決以往積累落嚟問題嘅時刻啦。而近日各方面亦開始有轉機，希望自己能夠有力量繼續去克服困難啦。

亦都值始多謝chumchum同表妹到醫院探我婆婆，當然亦唔少得mm，今日咁突然捉你出嚟同我睇場唔係咁吸引嘅戲。本來諗住開解個朋友反而要搵朋友陪番 =p

唔覺唔覺，今次係自從海豚離開後我第一次入場睇戲呢。

新Mon

2010-01-23T18:45:00.002+08:00

最近個Monitor一有比較淺色的畫面就會發出啲高音嘅怪聲，夜晚聽住都好辛苦，因為已經左耳長期耳鳴，所以想換好耐。不過搵model先發現要19'又支援HDMI只有LCD TV先做到，一般電腦Mon最少要22'先有我想要嘅功能。但係屋企冇位，所以一直都未決定。

今日同田田去黃金行下，發現咗Viewsonic有個model有IDTV之餘仲有內置DVD機，而價錢同畫面質量都比我之前睇其他牌子好，終於下定決心買咗番屋企。

試完機先發現原來之前個Mon唔止有怪聲，而且畫面已經有啲蒙，而家清楚好多，仲可以打PS3 :D

無奈...

2010-01-08T21:25:00.002+08:00

今朝一早睇報紙見到大老闆話我地集團有九成員工今年加人工，估唔到大半個鐘後我上司就同我講我其中一個下屬見緊人士部被截。

雖然都予計到會有第二波，不過冇諗過發生得咁突然而且自己下屬都有份。講真個下屬都幫到手而且工作都唔差，作為上司嘅我居然咩都做唔到同仲要咁遲先知，其實感覺都好無奈。

就好似屋企養咗14年隻狗仔，近排心臟病嚴重咗，睇見佢好辛苦但係除咗幫佢安排善終服務，睇住佢走完條路，其他咩都做唔到，感覺真係好唔開心。

Final Fantasy XIII

2010-01-04T18:58:00.002+08:00

已經有好幾年冇玩FF，最新一集終於係09年12月推出，結果放假都忍唔住買咗隻Game同PS3番屋企（其實PS3減價過陣已經好想買啦 :D）。

今集啲CG質素又突飛猛進，科技再發展落去會唔會將來唔再需要真人拍戲呢。雖然今集玩法嘅改動感覺的確冇之前的咁好玩，不過我覺得可以睇咁靚嘅CG已經值回票價。首自題曲仲幾好聽，下面係隻歌同啲CG。

Surprise~~

2009-12-29T21:34:00.002+08:00

放完晒假今日番工，竟然由Helen收到一份令我好surprise嘅聖誕禮物，係一張相同相架，下圖。至於點解會surprise，就係因為張相入面嘅相都係我影嫁，Helen佢揀咗部份出嚟做咗下面張相，真係估唔到會收到自己嘅作品做聖誕禮物，好開心。要放佢係公司枱頭先得。多謝晒Helen。亦都多謝其他送我禮物的朋友。:)

聖誕快樂！

2009-12-24T19:57:00.003+08:00

聖誕前夕一清早七點半就到機場，送朋友機，希望這朋友嘅新生活開開心心。今年兩次去機場都係送機呢，又係時候去下旅行先得。

之前幾日忙住準備禮物俾朋友同事，所以送完機之後就去咗買禮物俾屋企人，至於自己個份，仲未決定買唔買呢。不過前都收咗唔少禮物，多謝大家，亦祝各位聖誕快樂！ :)

聖誕禮物大合照 =p

三年啦

2009-12-14T22:37:00.002+08:00

今日又去主診醫生到做定期檢查，不經不覺已經治療完過咗三年。今次檢查都冇咩問題 :)

最近接收咗兩隻小海豚，已經安置好仲同佢地影咗張相俾佢地舊主睇，哈哈！

Soulmate Coffee

2009-12-12T23:41:00.008+08:00

今日要去幫海豚做嘢，放工之後就同佢、Monica一齊係朗豪坊食lunch，同影下朗豪坊啲聖誕裝飾，之後就起程去栢麗灣。

經過葵芳時，海豚強烈推薦我去葵涌廣場一間咖啡店，佢話咖啡好飲之餘啲店員仲好有He

art。去到一睇間鋪同我一向去嘅葵涌廣場感覺完全不同，就好似突然去咗starbuck之類嘅咖啡店咁，不過我就更加這店的裝修設計，黑白為主加上一啲親切的擺設，讓人感覺好舒服。特別鐘意啲招財貓，而且仲有JoJo歷險記，大家去可以試下搵下 :D。

至於店員，海豚用有Heart去形容的確好貼切，因為真係感覺到佢地好鐘意現在嘅工作。老闆同老闆娘（或者應該叫番卡片上寫嘅Director Secretary :p）都好nice同健談。佢地幫我地影咗張相，期待期待快啲有得睇。希望佢地一路都可以做得咁開心啦，真係好高興見到人有份自己熱愛嘅工作。

最後到咖啡，雖然我唔係一個好識評價咖啡就嘅人，不過我自己就覺得好飲啦，而且拉啲花仲好靚添。今日試嘅係Heidi推介嘅朱古力曲奇咖啡，好啱我這種鐘意朱古力嘅人。不過下次要叫佢地幫我再整熱啲杯咖啡就更好啦。今日因為要趕住搭車入栢麗灣，所以坐咗30分鐘都唔夠就走，有機會出葵芳一定要再去，唔知佢地有冇做lunch嘅呢。

黑白為主的設計，簡單得嚟感覺都好專業。

這杯是海豚叫的Hazelnut Latte，朵花好靚。左邊糖樽上是店鋪的Logo，而且仲有貓同老鼠 :p

聖誕就到，當然唔少得聖誕裝飾，我都好想買這些裝飾放係Office嘅聖誕樹。

走之前都要影下班得意嘅招財貓群。

驚喜..

2009-11-26T20:07:00.003+08:00

又差唔多到十二月，每年聖誕前都會準備份禮物寄去加拿大，今年都唔例外。琴日都帶咗份禮物準備lunch去郵局寄，估唔到番到公司竟然突然收到份加拿大寄來的禮物，好開心呢！

Sarah多謝晒，遲啲有機著件衫要影張相俾你睇先得。 =)

琴日仲買咗個新SATA II Harddisk去修理阿妹部電腦，但部機嘅底板只係support SATA，之前上網搵同問人都有唔同答案，而家終於証明到support SATA嘅底板係用到SATA II嘅Harddisk。

昂船州大橋百萬行

2009-11-17T23:29:00.004+08:00

剛過去的星期日參加咗昂船州大橋百萬行，係現在的公司做咗咁耐，由條橋的規劃到今年落成，通車前可以近距離接觸條橋，當然唔可以錯過咁難得的機會啦。所以第一次見百萬行宣傳的時候已決定報名。

今次百萬行好多人參加，大會為安全起見參加者都不能行到到橋邊，所以冇法係橋上影番碼頭全景，有啲可惜。下圖是已經過了橋，準備進隧道的一段，真係好多人。

當日天氣其實都幾差，係橋上好大塵，所以沒有藍天白雲，而且遠景朦朦。不過當日冇落雨同好似今日咁凍已經好彩。由於個天太灰，忍唔住強加一點藍 =D

咁難得嘅機會，裝備當然唔會少，當日帶了兩機三鏡，終於有機會好好發揮魚眼的功能。

當然唔少得同條橋合照啦。

恭喜恭喜!

2009-11-08T23:23:00.003+08:00

琴日又有一位朋友結婚啦，就係之前做卡送俾佢嗰位。見到佢昨日好開心，充滿甜蜜同快樂的感覺，再次祝佢兩人白頭到腦、幸福快樂啦。 =D

今日表妹嚟探我，係附近嘅一間日本鋪食lunch，不過啲職員態度麻麻，唔多想做我地生意咁，第二時都係唔再去攞。之後同佢上咗嚟我屋企座下，仲買咗啲好食嘅蛋撻當下午茶，不過屋企人冇咩食到，結果變咗我今晚消夜，而家食。

This Is It...

2009-11-05T21:05:00.002+08:00

前日又見言語治療師，唔經唔覺個已經係療程嘅最後一堂，由於說話方面有改進，暫時都不用再上堂啦。而最後一堂治療師要測試我的說話技巧，就叫我講下最近做過嘅事，而我就講咗關於最近睇咗紀念Michael Jackson嘅This Is It....

套戲真係好出色，亦應該話MJ的表演好出色。估唔到只係採排都咁認真，而且MJ的狀態好好，好難有人會想到佢身體狀態咁差。我覺得如果唔係未穿上舞衣同舞台未完成，基本上感覺同睇真正的演唱會沒多大分別。睇完套戲，的確能體會到MJ係音樂上的才華同認真的態度，如果MJ沒有離世，相信佢演唱會一定會非常精彩。唔能夠睇到對我地來講的確好可惜。

有興趣的朋友記得入場睇下，感受一下King of Pop的魅力。

賀卡完成

2009-10-20T21:01:00.004+08:00

今日印咗琴日造的圖出來，番屋企再做埋一些剪貼工作，賀卡完成啦。=)

2009/2010新界區百萬行 – 昂船洲大橋

2009-10-19T21:41:00.004+08:00

上星期係報紙見到百萬行嘅廣告，今次竟然係行昂船洲大橋，當時已經諗住報名啦。雖然我冇

份做條橋，但多年來每日番工睇住佢慢慢興建，到今年終於建成通車，覺得值得留念。難得又

有個機會近距離睇下，當然立即報名。今朝係報名的第一日，一早已經好多人報，攪到連報名

個webpage都入唔到，仲以為報唔到。好彩遲少少再入終於報到，不過最早個團就已經full啦。

下面係公益金條link，有興趣快啲報名啦。

http://www.commchest.org/hk/how/how_01_01_01_01.aspx?DocumentId=78

上星期收到Helen結婚的invitation card，對公仔好得意，尤其新郎好似佢老公。Weekend四圍

睇同買賀卡時，見到一張蛋糕卡，突然有個Idea決定再加啲心思上張卡到。哈哈都好耐冇造過

禮物俾人。下面就係我想造嘅卡的其中一部份，對公仔就係印係invitation card的公仔，執咗啲

顏色同心，聽日印埋出嚟就可以造埋第二部份。 =)

Happy Friday

2009-10-16T23:21:00.002+08:00

今日又攞咗No Pay Leave，一早就先去了探Angel，而家由新屋行去醫院只要30分鐘，冇諗過咁近。我都好耐冇去探佢，今日見佢比之前好好多，尤其係我地問佢一啲問題可以回應到，覺得好安慰，姑娘話佢早兩日可以坐落椅到，一路進步緊，希望佢繼續好番啦。

之後去咗同Teddy飲茶，Samson同Geraldene都一齊，好耐冇見佢地攞，不過都冇咩點變。跟住上Teddy屋企坐下同攪下部電腦。到六點左右就去Element同mm、海豚睇District 9。套戲個Idea好特別，跟其他異形片好唔同，唔係單乎打打殺殺。反而覺得諷刺緊人類對其他物種/種族的可怕態度。殺人/異形如同踏螞蟻，可能因為咁啲異形嘅造型都好似昆蟲。Teddy話套片有影射南非以前種族隔離主義，我個人不太清楚，不過就覺得套戲唔錯，值得入場。

步行籌款

2009-10-06T19:30:00.003+08:00

好耐冇去過行山啦，最近公司個懷社有個「抗癌大步走」籌款活動，主辦機構是癌症基金會，不過可以經懷社報名。可以行山之餘又可以做善事，所以今日就報咗名啦。

5公里 (適合有年幼小童及嬰兒車的家庭)

A香港國際學校 à B à C à D à C à B à返回A香港國際學校

步行時間: 約1小時30分鐘

10公里 (適合有經驗的行山人士，不適合有年幼小童及嬰兒車的家庭)

A香港國際學校 à B à C à D à E à B à 返回A香港國際學校

步行時間: 約2小時30分鐘

有兩個路程選擇，如果個山唔太高應該就揀10公里啦，到時仲可以影下相。唔知有冇其他朋友報咗名參加呢。

終於搬完屋

2009-09-27T13:35:00.002+08:00

忙咗個幾禮拜，終於搬咗去新屋啦。搬屋真係好煩，今次好彩唔駛攪裝修如果唔係一定仲忙。

新屋嘅感覺大咗，而亦比較靜同清涼，比起舊處係較好啦。而家等埋最後個櫃送來同執埋啲嘢就完成啦。 ^o^

生日先病

2009-09-02T22:05:00.005+08:00

剛剛過咗31歲嘅生日，第一次慶祝就係同Chumchum食飯，之後就係去挪亞方舟。到咗上星期五去咗mm屋企慶祝，又有蛋糕食。

係mm新屋切蛋榚

正日反而因為送傢俬而全日係新屋做嘢，仲發現原來有部冷氣機裡面被之前租客惡意破壞，個業主仲明知都唔同我地講，仲要係租約上加上日後有壞要我地自己出錢維修的條款，超激氣。

星期日就先去大埔同阿信、雪兒食lunch，之後就同表妹去咗火車博物管影相同食晚飯。都有好多年冇同佢出去影相啦。講真我影人係麻麻，都唔太識教佢企位同post，好彩佢本身啲post都唔錯。之後食完晚飯就番屋企。可能因為影相出完成身汗之後又出入冷氣地方，當晚就發燒啦，一直燒到琴日下午先退。而家啲感冒好惡攪。

影得較好嘅一張，咁埋都冇咩進步

本來星期一海豚約咗食飯都去唔到啦，唯有等好番再約啦。不過都多謝大家嘅message同慶祝活動。

Noah's Ark

2009-08-26T23:33:00.010+08:00

又成個星期冇寫blog，最近忙下攪新屋同執野都比較懶寫blog。 =p

上個星期五ChumChum就已經請我食生日飯，雖然嗰晚等咗佢好耐，不過都食咗餐豐富晚餐好開心。再講聲多謝先。

之後星期日為Becky同我慶祝生日，豬Sam一行10人去咗挪亞方舟。自從攪搬屋都冇咩影相，今次去得都帶相機影下。因為順便搵海豚比咗套書佢，好早已經去到馬灣啦。自己一個係馬灣公園行下，不過實在太熱，都冇咩心機影。

到咗四點入場，首先去舟內睇展覽，排隊已經排咗45分鐘。入面不準拍攝，睇咗一些關於方舟故事的介紹及相關展品，仲有些環保資訊。基本上45分鐘左右行完。出番來公園其他部分，大多六時都關了，而且其他活動區多為小朋友而設。最後睇埋上層的動物模型就走啦。我覺得入場費太貴唔係咁抵，相信都唔會比錢再去。之後一班人係馬灣食飯，跟住就番屋企，真係行到腳痛。

「孤寂」

我成日都覺得隻方舟起正係條橋下面影響晒佢巨大的感覺

入口
「慢步」
同Joide囡囡合照
仲有下個月嘅壽星女

日落朦朦，回家啦

忙忙..

2009-08-18T20:56:00.003+08:00

上星期六起租，竟然第一日就係新屋收到水務局cut水的通知，攪到琴日上午要即刻請下午放假去水務局攪，間屋冇租咁耐業主都唔轉番名，覺得佢好不負責任，只係識保證自己收到錢。不過好難搵到啱價錢同大細所以住住先，相信一年後都會試下搵新地方攞。

今日阿媽搵人換咗門鎖，星期六就會開始搬嘢過新屋。

今日仲去咗探Angel，一星期冇見佢，今日見佢比之前好好多，走的時候佢仲舉起隻手。相信佢會好快好番。 :D

最近有好多星加坡的朋友來香港，之前係TD做暑期工的「領會」來香港做一年野，星期六同佢同Loretta食飯。之後以前同Savi一起做Project嘅Danny亦再次來香港做project，聽日又一齊食飯啦。

準備搬家

2009-08-12T20:03:00.002+08:00

今日聽到同事講Angel已經離開ICU同佢地探佢時識笑，多咗反應係好蹟象呢，希望佢繼續努力快啲好番啦。

這兩日終於收咗大訂同簽好租約，15號開始起租。本來有諗過油下間屋，不過期望唔會住太耐所以都係唔油啦，而且屋主好似唔係好想咁。而家除咗執野仲要買兩張床同一個電視櫃，得閒再去IKEA睇睇。 =)

執野

2009-08-10T20:17:00.002+08:00

剛剛的週未先去mm屋企housewarming，同埋同Sharon慶祝生日，去之前經過灣仔就又去Teresa Festival買生日蛋糕。Housewarming當然唔少得board game，今次試埋新嗰盒卡卡城，都幾好要，想繼續再玩呢。

之後星期日就留係屋企執嘢，真係好鬼多嘢要執呢，有好多嘢唔想棄掉呢，希望可以幫佢地搵到新主人，唔想咁浪費。已經捐咗部份去互助社啦。

今日收咗大訂，聽日簽埋租約就準備新屋同買傢俬啦。

醫生週

2009-08-05T20:20:00.002+08:00

今日放假約咗Fanny食lunch，食之前同佢上去新屋到量尺寸來計劃下搬屋的安排，今晚會畫埋幅平面圖。下午就去咗睇主診醫生，又係一年一度大檢，照鼻鏡沒問題，下星期一再照MRI，星期二照肺照肝同驗血。

不過星期六仲要睇言語治療師同見鼻喉去除左耳導管，七日入面睇五次，希望樣樣都OK啦。 :D

琴日終於去咗睇Angel，雖然仲有兩聲咳，不過真係好想見下佢同了解下情況，唯有入到病房就死忍。減藥之後佢有知覺了，開到眼同聽到我地講嘢會有反應。雖然仲未清醒，不過相信會逐漸好起來。相信風雨過後總有光明，現在只有努力祈求佢快啲好起來。

祈求神能給予妳力量就日康復

2009-08-01T23:06:00.002+08:00

Angel嘅病情仲係好反覆，好想幫忙但又無能唯力，而家只有祈求神能給予她力量，幫佢渡過難關，早日醒番。今日本來想去探佢，因為唔想等阿峰去完旅行先一齊去，點知今日突然開始不停咳又唔去得。不過我依然相信好人會有好報，佢一定會無事。自己亦會繼續祈求上天對佢同其他朋友的幫助。

今日終於有人睇中而家層樓，雖然價錢冇想要的咁好，不過最後都接受咗，剛簽了臨時約，冇意外的話應該好快會搬家了。

擔心

2009-07-29T20:33:00.002+08:00

今日擔心咗成日，並唔係因為之前提的問題，而係今日突然得知一位朋友因病入院並送進了ICU，希望佢平安早日好番。

其實最近都聽到好多朋友嘅親友患上大病，希望大家都多注意身體健康，亦都希望大家的親友都早日康復。

又一日

2009-07-26T21:48:00.002+08:00

原來已經冇寫blog兩星期，星期五去Wilson屋企會所打羽毛球，自從新年受傷後都冇打過波，打一陣而家都仲腳痛。

琴日本來同阿安再去行南丫島行山，點知去到中環碼頭又落大雨，結果一班人食下飯吹下水算。傾計先知原來M記都大改動，亦炒咗唔少IT部門的人。真係希望個市快啲好番。

最近屋企發生咗啲唔開心嘅事，所以都冇咩心情影相同寫blog，不過生活就是這樣難以事事如意，唯有繼續續努力啦。

光影樓情

2009-07-13T20:15:00.013+08:00

剛過去的週未本來準備去南丫島行山，但係因為打風怕落大雨，結果取消咗。星期六休息了一天後，第二日就同mm，ram去睇殺人犯早場，$35睇咗場好戲好抵。其實我都好耐冇入戲院睇港產片，郭富城將角色那種近附精神分裂的狀態，由充滿自信到連最終自己都不信自己，真係表現得好好，唔怪得之前做咗兩屆影帝。另外個故事亦都好出人意表，而且直到片尾真真假假依然成謎，真真假假就讓觀衆決定啦。

睇完戲之後佢地去玩boardgame，我就冇去因為琴日係美荷樓開放日仲可順道去創意藝術中心睇埋「光影樓情」展覽，個影展展出了三位攝影師分別於石硤尾邨、蘇屋邨及牛頭角下邨所拍的一系列照片。佢地影嘅相都好出色，對於大家之前一窩蜂去影牛下的發燒友真係值得欣賞下。其中我自己最鐘意蘇屋嘅作品，特別有一張影到一位婆婆落樓嘅相，對稱如一幅畫的圖案亦同時表現出強烈對比，真係一看難忘。本來想影低留念，可惜燈光問題唔能夠將原相拍下，只有留在記憶了。

中心同時有伍振榮嘅影展，可以一次過睇埋，所以今個月真係值得去下石硤尾 :D 不過美荷樓唔係日日開，資料可以去以下網頁到睇。下面仲有啲琴日影嘅相同大家分享。

http://www.housingauthority.gov.hk/b5

美荷樓

這張還用魚眼拍了，期待魚眼效果呢
美荷樓中展出一些昔日的物品
又一次證明這隻獅子陪我一起長大
真的不準再屋邨踢球了
藝術中心

藍天下的石硤尾邨

越忙越精神

2009-07-08T19:09:00.004+08:00

之前成日清假加埋啲冇薪假，成日休息但係反而精神唔係咁好。今日係公司忙番日反而覺得精神啲，可能自己都係勞碌命啦。

今日睇到mm嗰blog，佢間新屋都裝修得七七八八，好高興啦。最近自己又多啲睇屋企附近樓宇，希望等到有啱嘅就努力供番間啦。

琴日MJ嘅追思會都冇睇到，其實以前都好鐘意聽佢嘅歌同睇佢跳舞，特別記得中學時有一次音樂堂，miss播咗一個佢嘅訪問俾我地睇，訪問中MJ係冇伴奏下，清唱再同時亨埋伴奏音樂，佢嘅音樂才華真係好出衆。另外好有印象就係佢同另一個MJ（Michael Jordan）拍嘅MV，因為中學時開始愛上打籃球，兩個偶像一同演出印象特別深刻。下面就係JAM嘅MV讓大家懷緬下。

http://www.youtube.com/watch?v=XvNJE4FFPP8

聚舊+飯團+生日飯

2009-07-05T18:53:00.004+08:00

這幾晚都出街食飯，星期四Master嘅同學Kenix約咗我同Venus聚下舊，去咗尖沙咀小南國，以前都好鐘意食小南國嘅嘢，不過今次去好失望，啲嘢貴咗之餘仲要唔好食。希望只係這間分店係咁啦，如果唔係，就要到上海先能再試到好食嘅小南國啦。=p

之後星期五就係好耐冇攪嘅飯團聚會，去咗尖沙咀恆香棧（真係同恆香餅家有關，入面有老婆餅食），食物同價錢都ok，仲有大房，不過我地超嘈，成間餐廳都聽到，我諗我地俾人black list咗攞。

琴日玩完卡game之後就同海豚及佢姊妹Tracy興祝海豚生日，雖然星期一先生日，不過要約佢這個大忙人都係要約早啲先得。我地係沙田新城市間Tutto食意大利嘢，都幾好食亦唔算貴，三日嚟講覺得最好都係這間啦。

食完三日，今日就係屋企休息下同食清啲。今日經過OK便利店發現KOEI出咗隻三國志Online，入門包都係$11，所以買咗包嚟試下，唔知好唔好玩呢。

71又城市遠足

2009-07-01T20:34:00.013+08:00

琴日番咗一日工又放假，本來今日諗住唔出街休息下，但當去完食早餐之後，發覺天氣實在好好，唔出去影下相有啲可惜，結果食完嘢就番屋企執我嘅兩機三鏡出嚟去遠足。

今次又由屋企起步，不過方向係紅磡過邊，試下行一啲平時好少行嘅路。由馬頭圍道一直行去到Poly，之後再去火車站，71見到啲區旗同國旗，又影下。

跟住係尖東食lunch休息下，最後再行去天星碼頭。本來諗過搭船過海再去中環影，不過見到遊輪碼頭停咗「忠僕號」係到，結果決定上船參觀下同睇書展。

上船參觀大人要俾$10入場，小童或65歲以上唔洗。不過其實唔多而且係做善事，都冇所謂。上船未睇書前先參觀下四週關於這隻船嘅資料同影下相。

「吹奏」

書展入面都好多書，尤其係宗教同小朋友嘅書籍，而且啲書都好平，特別係聖經，終於明白點解船名為「忠僕」。我都係入面買咗本書，如果有小朋友不妨帶佢嚟睇下。

個書展唯一唔好嘅地方就係比較焗，可能因為今日熱啦，好彩都有位出去吹下風。

走之前見到個好特別嘅捐款箱，係用船上嘅喉造嫁。

之後入番海運去洗下面，點知見到個七小褔七十五週年相片展覽，當然又走埋去參觀啦。

大家知唔知這女子是誰？原來係元秋出道嘅相，我對佢都係得「功夫」套戲入面嘅造型，真係認唔到。

一張好舊嘅戲票，不過保存得好好。實在行得太耐啦，最後係海旁影多陣相，冇等到日落就番屋企休息。好充實嘅一日。

變型金剛

2009-06-28T22:31:00.002+08:00

今朝一早就起身同屋企人飲茶，之後就去老人院探阿爺阿嫲，緊住就同mm、Hugo、Ronald去奧海城睇變改金剛2。套戲嘅感覺同上次差唔多，不過今次覺得太多機械人啦，有啲仲要變完身後好似樣，都分唔到狂定博派。不過動畫畫面都仲係好好睇嘅，都值得睇下，不過如果再有下集而劇情冇咩改進可能就唔會再入場攞。

之後大家食完飯就去玩board gmae，最近好似大家都多咗出嚟玩，同埋啲新嘅board game唔洗太花時間學，所以多咗人一齊玩，幾好。

琴日仲同阿媽開始傾買樓，問完mm一啲資料，計定budget等有機會就出手，目前都仲係太貴所以會再等下先。

Fisheye Trial

2009-06-27T22:35:00.007+08:00

買咗支魚眼鏡都一個月啦，終於影完筒菲林同晒相睇下。魚眼嘅effect係好好玩，不過其實好唔慣，有時都唔知應該點構圖，睇嚟要用多啲先得。

不過好麻煩，因為支鏡係AIS，所以用係F80s嘅時候冇測光，要成日換鏡，突然好想有部D700呢。可惜冇錢買 =p

下面係晒相鋪造scan嘅菲林相，分享分享。

星巴克冰室

2009-06-22T22:16:00.007+08:00

之前都提過一間「社區二手店」讓大家把一些沒有用的東西以低價賣出，幫助一些低收入人士，又環保。今朝終於同Hugo去咗佢地長沙灣嘅總店睇下，把一些沒用的書同CD捐出。Hugo仲攞咗兩個電水壺去。

因為又要見Speech Therapy，咁啱最近中環又開咗間出名冰室，所以之後就去中環。間鋪位於都爹利街，未聽過，四圍行試搵咗一輪，最後都要問警察 =p

入到去飲咗杯新嘅Coffee Jerry，當然唔少得影相啦，唔影好似對唔住店主（睇下面就知點解）。

基本上覺得啲設計同裝置都有懷舊冰室感覺，唯一可能有問題係這海報，冰室文化真由1971年開始嗎？佢地寫1971係因為Starbucks由這年開業。
冰室餐牌
第一次見Starbucks sell tea =D

唔影唔得啦

因為食完飯冇幾耐就去，所以好飽試唔到佢地嘅冰室三寶（蛋撻、波蘿包同雞尾包，我成日以為冰室之寶一定有西多份），仲唔記得影張三寶嘅相，唯有下次啦。

城市遠足

2009-06-21T23:37:00.007+08:00

今日雖然係父親節，不過屋企一向都提前興祝，所以只係大家晚上一齊食飯睇下戲就算啦。今晚終於睇晒成套葉問，真係打得好好睇，唯一覺得個尾場日本人將軍突然變得好弱，或者咁先顯得葉問嘅強啦。

講番今日仲去過邊，中午就由屋企出去，又一路行一路影，一直行到去九龍城褰城公園，帶咗兩機三鏡，因為想繼續試魚眼呢。本來想一路行到鑽石山，不過太熱同太重，最後係九龍城影長啲時間。

昔日嘅汽車渡輪碼頭，到現在依然荒廢

原來土瓜灣道係一直伸延至舊機機邊嘅宋皇台道，我住咁耐都係今日先知。九龍城褰城公園入面又有新嘢，一幅城褰嘅畫
「洗白白」
「洗手間左邊呀」

影完相就去咗深水埗鴨記幫阿媽買嘢，我亦買咗個SONY老翻耳筒，$45但啲聲都唔錯喎，唔怪得平時見到咁多人買。之後番屋企攞埋啲相去晒，本來今晚有得睇，但係俾葉問嘅詠春拳打到短暫失憶 =p 唯有聽朝攞，好期待啲魚眼相呢。

長長weekend

2009-06-20T22:06:00.003+08:00

琴日lunch個陣又做咗postman，寄咗啲張小嫻小說出去啦，唔覺唔覺咁樣寄嘢去加拿大都有五年，仲要每次都係lunch去葵芳間郵局，就算搬咗去T9都係咁，唔通這已變成我習慣？haha 今次仲用自己影嘅相做咗啲poatcard，雖然手工麻麻，始終勞作方面較差，不過用自己啲相做postcard嘅感覺都幾好（明明啲相未夠靚做postcard都硬來，自我滿足下haha）。

收工約咗海豚食飯，搭公司車去咗銅鑼灣，食飯前先去中央圖書館，真係好多書睇，仲要好多新書。咁啱那裡又攪緊攝影書展，其中有一本好想借呢。不過要等展出完咗已可以借（展覽至7月14日），到時再去。其實我想如果星期五放早去睇下書都好，佢又開得夜，九點先關閉，可以慢慢睇，唔駛好似去紅磡嗰間咁趕。

之後本來想同海豚去888食拉麵，但竟然6點半已經要等位，結果去咗樓上間日本嘢。食完飯行咗陣就番屋企啦。

根住嚟緊星期一、二都清假，六月最長嘅weekend開始啦 =D

小心Coupon

2009-06-18T21:54:00.002+08:00

最近好多公司都出coupon減價吸引人，大家亦應該係email到收唔少。我今日email又收到啲UA同Adidas嘅coupon，好心forward俾啲朋友，點知原來啲coupon係唔可以copy用，唔知啲人係咪刻意整古人定冇心啦，攪到有朋友用咗俾鋪頭嘅人話。係度想同佢地講聲Sorry。

或者我以後都唔亂forward啲coupon啦，因為自己又唔會check，以免誤導他人。大家收到coupon時亦要小心啦。

心的視介

2009-06-16T21:56:00.002+08:00

柯錫杰這位台灣有名的攝影師，係未曾閱讀過佢寫的「心的視介柯錫杰的攝影美學」之前，其實我從未聽過佢的名字。

於數月前，有一天經過三聯書局睇書的時候，隨手那起這本書時，原本想看看晝中有沒有值得參考的作品，立刻被吸引住，但吸引我的並不是那些相片，而是書入面作者所寫的生路歷程以及作為攝影者的心態的分享。但我並不是指那些相片並不吸引，其實只是我藝術方面的層次太低，未能懂得好好欣賞他的作品。

其中作者提及的想法，如「對被攝者的愛」、「用心去感受世界的美」、「美感不屬於別人，只屬於自己」、「多看自己的作品」、「大量閱讀」等等，我都好欣賞亦認同。

其中「美感不屬於別人，只屬於自己」與麥Sir經常提到的Desire就一墨相承，要拍出屬於自己而又能讓別人去感受的作品，自己必先要去感受同深思自己所想表達的意念。

另外作者提到數碼相機的方便，使到大家慣於把自己覺得拍得不好的作品削掉，但其實很多時候自己都未有認真看清楚這些棄掉的作品呢。雖然作者寫拍兩百張看兩千次可能有些夸張，但的確於不同時間、不同心情、不同情況下看一張作品時，感覺的確是不同的。這方面於去年第一次舉辦影展時已經經歷過，那些展出的照片大部份都是以前拍下，當時亦從未感覺到那些相片可以用來展出，但多年再看，感覺的確不一樣了。

最後想講是大量閱讀，這方面其實在遇上麥sir時已經發現，當我上堂聽佢講拍攝教堂前，先去了解不同建築風格及特質時，我已經體會到自己不能進步的原因。沒有足夠知識及修養去了解身處的世界，又如何去感受，沒有感受又怎能拍出帶給別人感受的作品呢。作者書中所寫「把眼睛、耳朵關起來的，絕對不行。不肯用心思考、領會的，也不行。真的要把攝影學好，不是那些《快速入門》、《技巧解說》的書能告訴我們的。去看表演、去看舞蹈、去看名畫、去聽音樂、去讀各種領域的書，詩、散文、小說，哲學、科學、天文學.......必須通通都讀」雖然有些夸張，但事實上知識的確能幫助我們創作。

書中還有很多心的視介分享，不能盡錄。或者大家搵這本書睇下，自己去感受，可能又能體會到更多攝影意念。最後分享一張我鐘意嘅柯錫杰作品。這張相名為「孤燈」，我好欣賞相中的色彩及線條。柯錫杰把這街通拍成舞台一樣，用相片表現他希望太太一同到美國專研她的舞蹈的心情。他說「舞台有了，燈光有了，就是缺少了一個舞者。」

寫完這編分享剛好差不多到了Michelle生日，先係度祝你生日快樂啦！影多啲靚相。 =D

第二個放假星期一

2009-06-15T19:27:00.002+08:00

今日係清假月第二日假，起身做完啲家務後就出咗去中環。因為除咗要睇醫生之外仲約咗Karen食lunch，其實真係好耐冇見佢，對上一次好似都成年前啦。今日仲係佢嘅生日呢，再次係度祝你生日快樂！忙還忙，記得要好好休息保持身體健康。

之後行咗陣就去咗睇Speech Therapist，連埋之前買鏡頭同字典機，今個月超支晒，跟住落嚟要洗少啲先得。睇完Therapist之後再去番之前攪影展晒相間lab晒相，10張5R+2張8F都係$38，仲要半個鐘攞得，真係超抵。

番屋企前經過書店見到張小嫻又出新書，又係時候寫信攞。

日文電子字典

2009-06-13T13:02:00.002+08:00

個妹聽日就會去日本留學，之前都諗咗一段時間買樣咩禮物俾佢好，早兩日諗起日文電子字典可能有用所以就上網搵資料。發現最多人講嘅係canon出品，於是收工就去旺角啲豐澤睇，結果係搵唔到，得啲好易通、快譯通，佢地原來都有日漢字典，個sales好努力咁sell，不過又好老實咁同我講這些日漢字典功能一般，但係又話我知佢sell字典好耐啦，出面冇其他好強功能嘅日漢字典。好彩之前有做功課，唔係又中招 =D

最後諗下canon出嘅，應該佢尖沙咀個大型陳列室實有，於是即去，點知又係冇。好彩唔係得個桔，啲sales俾咗代理個地址我，係銅鑼灣嘅向日葵出版社，真係估唔到成個香港得一書局做代理，其他地方都冇，冇計，去。

跟地址去到，竟然冇這間鋪，即時冇奈啦，不過好彩又冇放棄，去管理處問問，佢地竟然有間鋪個新地址，仲要係間離街，最後終於買到。都唔知係好彩定唔好彩，行餐飽，不過都買到。

下面係canon日文電子字典嘅資料同向日葵綱址，有需要睇睇，唔好好似我咁四圍搵。
Canon 日文電子字典
向日葵出版

深圳洪湖公園荷花展

2009-06-09T22:48:00.002+08:00

琴晚旺角又有強水彈，真係恐怖，今次個水彈仲要發生係我朋友平常工作的位置，好彩佢琴晚開會，冇係街搵客，所以冇受傷。而家出旺角要行埋啲先安全。

講番荷花展，剛剛過去嘅星期日同MM、Pauline、Cissy、Michael、Rinky(成班都係麥sir的學生)去咗深圳洪湖公園影荷花。公園入面真係有好多荷花，以travel time嚟計的確係唔錯嘅選擇，唯一可惜係人太多而好多人都冇公德心，比較多垃圾同近嘅荷花都俾人破壞晒（唔似三水咁好），如果冇帶長鏡就好難影啲靚啲嘅荷花。但如果對荷花有興趣其實值得一去，因為花多，較易搵到靚花同題材。

下面揀咗幾張今次影又題名咗嘅相同大家分享，其他可以去我album睇啦 =)

美 (這張相其實未諗到個理想嘅題名，但這未開嘅花的確俾到我美嘅感覺)

花冠

演變

超然

漂泊

相依

清假月

2009-06-08T21:02:00.003+08:00

今年開始到年中就要清約四成嘅假期，加上兩日嘅冇薪假，今個月就有好多假放啦，之後三個星期邊禮拜一都放假。

今日就係清假嘅第一日，一就去覆診check下鼻同耳仔。之後又同Edmond、小強食飯，又去埋北角賣埋之前啲舊書，咁又一日。

途中經過HMV時入咗去Jass個section睇Flamenco啲碟，突然聽到把好好聽嘅女聲，但係唱緊嘅係Michael Jackson嘅Billie Jeans =O=。繼David Garnet玩Smooth Criminal之後又一次驚喜，之後上網查下，發現佢叫Susan Wong。大家有興趣聽jass嘅可以聽下，下面係佢隻碟嘅廣告。

都仲未處理琴日去深圳洪湖公園影嘅相，都冇咩休息，加上放幾日假都係早起身，所以仲係好攰，今晚都係早啲訓先得。 =)

魚眼入手

2009-06-06T21:15:00.006+08:00

以前已經一直都好想買支魚眼鏡玩下，好想試下大頭狗種感覺，但係Nikon魚眼實在太貴，而相對用嘅機會唔大，所以一直都冇買。其實我有留意俄仔Zenitar 支魚眼，之前信和賣$1600左右，但要加mount先用得仲要對唔到無限遠，所以又買唔落手。等到Zenitar出nikon mount魚眼，信和間鋪已經唔入這支鏡。 =.=

結果試下搵二手但nikon mount 嘅啲人要$1800樓上先放，仲要冇咩人賣。本來已經諗住放棄啦，點之兩個禮拜前係ebay見到有鋪放USD185仲要連運費，即時心動啦。但係實在太平（我以前係ebay搵這鏡連運費差唔多$2000），所以都考慮咗一個禮拜。但係諗番以前買嘅嘢都ok，而亦都睇個啲人俾間鋪嘅評語都好正面，所以上星期日決定一試，買咗 =p。

正常船運international flat rate要兩至三星期先到，點知今日番屋企突然有大盒嘢係枱，flat rate五日到貨!?冇可能！結果睇清楚原來佢寄Priority Mail俾我都唔收Shipping charge，間鋪真係太好啦。佢出個post都係寫flat rate，其實冇需要咁貴寄俾我。

之後check埋支鏡，除咗表面的塵外（吹得走），原全冇問題。這間ebay鋪實在太好，我以後去ebay買嘢都會睇這間先。下面係新拍檔嘅相。 =D

隨手試拍，聽日再用菲林機試。

努力生活

2009-06-04T23:03:00.002+08:00

今日放工搭車見到馬生，佢一見到我就話我瘦咗，之後就搵咗坐係車後面嘅一位ops同事阿裝過嚟介紹我識。原來阿裝之前都有過癌病，好番之後進行咗食療身體而家好健康，所以馬生搵佢同我交流下。佢話聽日會send啲餐單俾我試下。睇見身邊嘅人咁關心自己好開心，覺得自己都應該努力啲攪好啲生活習慣，保持健康。

之後就同海豚去翻生侏羅館 2，雖然劇情有啲無聊，不過都好好笑，睇嚟輕鬆下都唔錯。啱晒海豚放鬆下啦，佢都忙咗成個幾兩個月，都好耐冇搵佢出嚟睇戲。

今日仲係K小姐生日，係到再同佢講聲生日快樂！ =D

NPL

2009-06-01T21:29:00.002+08:00

今日係冇薪假實施後第一次收到糧單，終於體會咗我個兩日假嘅價值啦 haha~~

雖然唔算好多錢，不過想到以後都會唔見咁啲糧都係有啲唔開心。另外就係覺得扣得咁少錢，好似自己似乎唔夠努力工作啦。

綠海龜@濕地公園

2009-05-31T21:37:00.003+08:00

之前係度分享過其他人嘅海底攝影，雖然自己冇機會潛入咁靚嘅海底影相，不過今日去濕地公園影綠海龜都讓我体驗下影水底生物嘅美麗。嗰幾隻綠海龜真係好得意，好似睇緊動畫咁。個展覽會去到6月底（如果冇記錯，錯嘅話請更正我 =p），有興趣嘅朋友要快啲去睇下。

去完濕地公園後就去咗Hugo屋企睇Ronald係日本影嘅結婚相，又一次見證fotoshop之強！ =D

之後去旺角交收埋yahoo賣嘅嘢就番屋企休息，而家身體真係唔好，影一陣相就倦，琴日都係咁，真係要聽阿信講跑下步先得。

「你好！」

除咗海龜外，仲有有啲古惑嘅貝貝。其他相可以去我Album睇啦。

小人國2

2009-05-31T00:12:00.011+08:00

今日下午就出咗去同阿信食飯慶祝佢生日，去咗由小學開始已經開業嘅歌登堡餐廳，估唔到有咁多人幫襯，好彩早咗少少去攞位。之後就係土瓜灣四圍行影下相，今次仲行咗上去紅燈山，點解以前我唔發現山上景觀咁靚呢。仲記得以前有段時間同阿信放學後係到玩四驅車 =p

之後夜晚就同VG睇咗「小人國2」這套舞台劇，其實我甚少睇舞台劇，今次都係佢介紹先知。之前買飛過陣已經發現佢加場都好快爆滿，睇完套劇及演員嘅落力演出，都明白佢地咁受歡迎。

首先劇情以很多社會熱話，包括時事、娛樂、共眾人物以及一啲社會現象（如公司栽員、youtube見到嘅怪人行徑）為題，已經容易引起觀眾共鳴。再加上演員精彩亦低死嘅演出，除咗讓觀眾開心笑一晚外，亦能俾觀眾對劇中想帶出嘅話題留下深刻印象。因為佢地演出未完，所以套劇嘅內容就唔寫太多，唯一想再一讚佢地最後一幕及ending參考「平民百萬富翁」好正，可惜VG之前冇睇套戲，如果唔係實笑死佢。雖然啲飛唔平，不過都覺得值得呀可以笑咗個開心嘅晚上。

最後唯一覺得可惜就係感覺到大家都對這些社會話題覺得咁可笑，但係除咗一笑置之之外就讓佢地繼續發生，其實真係值得深思。

海底攝影

2009-05-28T18:06:00.002+08:00

琴晚同朋友食飯，因為朋友未到，餐廳嘅職員好好咁俾咗本雜志我睇，其中睇到一編講關於一位水底攝影師David Doubilet嘅文章。相信這類相片我就真係冇法影到啦，所以都係欣賞下人地嘅作品。下面係一啲David嘅作品，真係好靚，係我冇法接觸嘅美麗世界呢。有興趣可以去佢網頁睇多啲。= )

http://www.daviddoubilet.com/

二手書店

2009-05-24T20:12:00.002+08:00

今朝有時間，就收拾咗一啲舊書攞去以前提過嘅二手書店（精神書店）到賣。今次攞咗三本書去，每本只賣得$5，雖然比較少錢，不過以環保理念出發都冇所謂啦，因為啲書最後都要棄置或俾人。仲有一點，這書店網頁寫咩書都收，不過其實太舊或太殘係唔收嫁。

至於書店出售嘅書都幾平，書嘅類型都多，書亦保養得幾好，有機會經過不妨去睇下。我今日都買咗兩本攝影書呢。

之後下晝就去cityU玩card game，最近買咗副「三國殺」，都幾好玩，不過有人話佢嘅design係抄外國一副叫Bang嘅card game。遲啲要叫海豚玩下證實下先得。下面係三國殺嘅資料。

http://www.sanguosha.com/

新網誌開幕...

2009-05-23T13:53:00.002+08:00

之前一直用yahoo blog寫網誌，不過因為朋友們都要開個yahoo account先可以留言比較麻煩，而且因為我有一段時間因為冇寫網誌，有些朋友連開咗嘅yahoo account都忘掉了。所以現在把網誌搬到blogger相信大家會比較方便，尤其我用開picasa，以後upload相就唔洗copy link啦 haha。

除此之外，我亦幫個blog加番啲banner同design，算係我個人網頁嘅前奏。如果大家有去過我上年同朋友攪嘅影展，應該會認得張banner啦 =)

希望大家俾啲意見我啦。