城市遠足

今日雖然係父親節，不過屋企一向都提前興祝，所以只係大家晚上一齊食飯睇下戲就算啦。今晚終於睇晒成套葉問，真係打得好好睇，唯一覺得個尾場日本人將軍突然變得好弱，或者咁先顯得葉問嘅強啦。

講番今日仲去過邊，中午就由屋企出去，又一路行一路影，一直行到去九龍城褰城公園，帶咗兩機三鏡，因為想繼續試魚眼呢。本來想一路行到鑽石山，不過太熱同太重，最後係九龍城影長啲時間。

昔日嘅汽車渡輪碼頭，到現在依然荒廢

原來土瓜灣道係一直伸延至舊機機邊嘅宋皇台道，我住咁耐都係今日先知。 九龍城褰城公園入面又有新嘢，一幅城褰嘅畫
「洗白白」
「洗手間左邊呀」

影完相就去咗深水埗鴨記幫阿媽買嘢，我亦買咗個SONY老翻耳筒，$45但啲聲都唔錯喎，唔怪得平時見到咁多人買。之後番屋企攞埋啲相去晒，本來今晚有得睇，但係俾葉問嘅詠春拳打到短暫失憶 =p 唯有聽朝攞，好期待啲魚眼相呢。